A iniciativa, vinculada ao programa Silleda Dinamiza, pretende que as persoas maiores sexan protagonistas activas na organización e desenvolvemento de actividades nos equipamentos municipais do rural.
O programa comezará o vindeiro 15 de outubro con obradoiros de memoria e estimulación cognitiva, que se impartirán de balde ata maio en Cira, Lamela, Escuadro e Cortegada. Estas sesións incluirán exercicios de memoria, atención, linguaxe e cálculo, ademais de fomentar o encontro social.
Ademais, un enfermeiro xubilado ofrecerá sesións divulgativas sobre coidados e hixiene para persoas maiores, abordando cuestións de benestar, hábitos saudables e prevención de riscos.
O Concello concibe estas actividades como o inicio dun programa con vocación de continuidade, aberto a novas propostas e persoas voluntarias. Trabállase na creación dun banco de saberes sénior para canalizar coñecementos e habilidades.
As actividades desenvolveranse preferentemente en centros sociais e locais veciñais para achegarse ao rural e facilitar a participación. O Concello coordinará os voluntarios, calendarios e espazos, co apoio do tecido asociativo.
O goberno local busca avanzar nun modelo de envellecemento activo e dinamización comunitaria, aproveitando a experiencia das persoas maiores. "Hai moitas persoas xubiladas con coñecementos, experiencia e ganas de colaborar, e pensamos que é importante darlles a oportunidade e o espazo para facelo", sinalan desde o Concello.
