O Concello de Cedeira informou do inicio dos traballos de ampliación da piscina municipal, unha actuación moi esperada para o municipio que se materializa grazas a un convenio de colaboración entre a administración local e a Deputación Provincial da Coruña.
O proxecto permitirá pasar do actual vaso de 16x8 metros a un novo de 25x11,6 metros, homologable á maioría das piscinas semiolímpicas. Ademais, a intervención mellorará a eficiencia enerxética da instalación, que ten case 35 anos de antigüidade.
A reforma inclúe a construción de novos muros para unha cuberta renovada e a instalación dunha fachada de vidro illante no lado leste para aproveitar a luz natural. Tamén se aumentará a superficie de praia e se incorporarán novos equipos de depuración de auga, renovación de aire e iluminación.
