A empresa adxudicataria, Construcciones y Obras Taboada Ramos S.L.U., xa está a traballar nos primeiros labores de limpeza e acondicionamento do terreo. As obras continuarán nos vindeiros días en Cortegada, onde se realizarán os traballos previos de preparación e limpeza de cunetas antes de avanzar nas seguintes fases.
A alcaldesa de Silleda e concelleira de Obras, Paula Fernández Pena, supervisou o inicio dos traballos en Cervaña, destacando a importancia da actuación tanto polo investimento como pola extensión, xa que permite mellorar de maneira conxunta varios camiños en tres parroquias. Sinalou que estas vías son de uso diario para a veciñanza e tamén para a actividade agrogandeira, polo que as melloras repercuten directamente na mobilidade e seguridade do rural.
O proxecto abrangue camiños municipais en Barreiro e Pedrouzo (parroquia de Graba); Alfonsiños e Ouzande (en Cervaña); e Camporrapado e A Revolta (en Cortegada). Os traballos inclúen a renovación do firme, a limpeza e acondicionamento das cunetas para unha correcta drenaxe, e en tramos recomendables, a execución de pavimento de formigón armado para incrementar a resistencia e vida útil.
Paula Fernández lembrou que antes da licitación se mantiveron reunións coa veciñanza dos lugares afectados para explicar as intervencións previstas e recoller achegas. "É unha forma de traballar que queremos seguir mantendo. Antes de actuar escoitamos á veciñanza, visitamos os lugares e analizamos as necesidades sobre o terreo", engadiu a alcaldesa, subliñando que agora se materializan estas melloras cun investimento importante que chegará a seis núcleos.
A actuación está financiada a través do Plan +Provincia da Deputación de Pontevedra e forma parte do programa municipal de mellora progresiva das infraestruturas viarias do rural. "Seguimos avanzando na mellora dos servizos e das infraestruturas das parroquias. Temos un territorio moi extenso e unha ampla rede de camiños municipais, e por iso é fundamental continuar destinando recursos a actuacións que faciliten os accesos ás vivendas e explotacións e melloren a calidade de vida da veciñanza", concluíu.
