O Concello de Silleda presentou o novo Centro de Dinamización de Escuadro, unha iniciativa que forma parte do programa Silleda Dinamiza co obxectivo de converter este equipamento municipal nun espazo activo e aberto á participación veciñal cunha programación continuada.
A primeira actividade desta nova etapa estivo protagonizada por nenos e nenas de 3º de Educación Primaria do CEIP Plurilingüe de Silleda. O alumnado participou na primeira visita escolar organizada arredor do Centro de Interpretación da Natureza, que incluíu unha ruta de sendeirismo pola contorna de Férveda e unha xornada no propio centro de interpretación.
Durante a visita, traballáronse contidos sobre biodiversidade, ecosistemas e o coidado da natureza, combinando a observación directa coa explicación dos valores ambientais. Estas visitas escolares continuarán e ofertaranse a outros centros educativos, reforzando a vertente didáctica do equipamento.
O Centro de Dinamización de Escuadro forma parte dunha experiencia piloto do programa Silleda Dinamiza, que busca ampliar os usos do espazo para que funcione como punto de encontro e dinamización, aproveitando os recursos naturais e sociais da contorna. Á programación educativa sumaranse actividades para a veciñanza, cursos, obradoiros e propostas de lecer.
“"Queremos que este sexa un espazo vivo, que teña actividade e que sirva tanto para dar a coñecer a riqueza natural de Escuadro como para xerar novas propostas para a veciñanza."
A alcaldesa, Paula Fernández Pena, xunto coas concelleiras de Medio Rural, Asunción García, e de Educación, Ángela Troitiño, participaron na visita. A apertura diaria das instalacións amplía as posibilidades deste equipamento municipal, que xa rexistrou preto dun cento de visitas desde a súa apertura a mediados de setembro.
Esta iniciativa cumpre co obxectivo de Silleda Dinamiza de aproveitar mellor os equipamentos municipais e convertelos en focos de actividade tamén no rural, promovendo a participación e a dinamización social.
