O Grupo 1 da Preferente Futgal xa ten un novo campión. A falta de catro xornadas para a conclusión do campionato, o CD Lalín asegurou matematicamente o seu ascenso á Terceira RFEF este domingo, tras impoñerse ao Dumbría por 1-2.

O conxunto roxinegro chegaba ao campo de O Conco cunha racha positiva, despois de encadear vitorias contra o Paiosaco, Victoria e Val de Narón. A pesar da dificultade de puntuar neste terreo de xogo, o equipo do Deza logrou levar os tres puntos nun final de partido cheo de emoción.

O encontro mantívose igualado ata o minuto 70, cando un tanto de Martín López adiantou ao Lalín no marcador. Non obstante, o soño do ascenso directo pareceu desvanecerse cando o Dumbría empatou no minuto 90+2, grazas a un gol de Diego Estévez, o que supuxo un xerro de auga fría para os numerosos afeccionados desprazados.

A tristeza inicial transformouse en euforia desmedida tan só tres minutos despois. Un gol de Aaron Soto no minuto 90+5 volveu poñer ao Lalín por diante, selando así o ascenso directo á Terceira División nun desenlace memorable.

Tras a vitoria en Dumbría, a celebración trasladouse ás rúas da capital do Deza. Centos de persoas, entre xogadores, directiva e afeccionados, festexaron o ansiado ascenso con vítores e bengalas vermellas, prolongándose a festa ata ben entrada a noite.