O director xeral de Gandaría, Agricultura e Industrias Agroalimentarias, José Balseiros, asistiu á demostración de Preparación e Presentación de animais, que tivo lugar na Finca Mouriscade. Nesta iniciativa participaron máis dunha vintena de mozas e mozos de entre 9 e 25 anos.
Balseiros felicitou aos participantes e subliñou a importancia desta Escola como ferramenta para impulsar a remuda xeracional nas explotacións, unha das principais liñas de traballo da Consellería. O Goberno galego fomenta esta renovación a través de diversas medidas como a formación, axudas para a incorporación de novos profesionais, plans de mellora e o Banco de explotacións.
Destacou tamén o papel dos seis centros de Formación e Experimentación Agraria (CFEA) adscritos a Medio Rural, que rexistran unha alta demanda de prazas para o vindeiro curso, o que evidencia o compromiso da Xunta coa formación agraria.
Finalmente, o director xeral agradeceu o labor dos organizadores, a Federación Frisona Galega e o Club de Xóvenes Gandeiros de Galicia, así como o apoio de Cooperativas Lácteas Unidas (CLUN) e da Deputación Pontevedra.
