As probas, que se desenvolverán entre o sábado 25 e o domingo 26 de abril, concentrarán a un total de 8.484 aspirantes que optan a postos de enfermaría especialista e de persoal de servizos xerais (PSX). Este evento converterá de novo a Silleda nun punto neurálxico para o emprego público sanitario galego.

A xornada do sábado comezará ás 9:30 horas coas especialidades de enfermaría obstétrico-xinecolóxica (matrón/a), con 348 convocados para 69 prazas, e enfermaría pediátrica, con 210 inscritos para 60 prazas. Pola tarde, a partir das 16:00 horas, será a quenda de enfermaría familiar e comunitaria, con 838 aspirantes para 128 prazas, e enfermaría do traballo, con 32 persoas para 3 prazas.

O domingo 26 de abril, tamén desde as 16:00 horas, realizaranse os exames para a categoría de persoal de servizos xerais, que convoca a 7.056 persoas para 236 prazas. Destas, 226 corresponden á quenda xeral e 10 están reservadas para a quenda de discapacidade intelectual, cuxa proba se celebrará simultaneamente.

A Xunta de Galicia subliña a inclusión do exame para persoas con discapacidade intelectual, destacando o esforzo de adaptación das probas e dos postos de traballo. Esta iniciativa foi recoñecida por FADEMGA Plena inclusión Galicia como un exemplo de boas prácticas no acceso ao emprego público.

O Sergas informou aos aspirantes sobre as normas de acceso ao recinto, incluíndo a obrigatoriedade de presentar o código QR impreso e a prohibición de dispositivos electrónicos como teléfonos móbiles, reloxos intelixentes ou auriculares. A posesión destes aparellos pode ser motivo de anulación do exercicio.

Para garantir o correcto desenvolvemento das probas, contarase coa colaboración de persoal do Sergas, forzas e corpos de seguridade, Protección Civil, ACEGA, o 061 e Cruz Vermella, ademais do persoal da Fundación Semana Verde de Galicia.