O delegado territorial da Xunta en Pontevedra, Pablo Fernández, visitou o parque empresarial Merlín para supervisar a achega, que forma parte dunha liña de axudas autonómicas destinada á habilitación e mellora das áreas empresariais de Galicia.
Esta actuación no parque empresarial Merlín conta cunha achega de preto de 120.000 euros, que representa o 80% do investimento total. O obxectivo é impulsar a mellora das súas infraestruturas, creando un contorno máis axeitado para as empresas xa instaladas e para as que poidan establecerse no futuro, especialmente no ámbito rural.
O delegado territorial destacou a importancia destes investimentos para que os parques empresariais dispoñan de espazos e servizos adecuados para o desenvolvemento da actividade económica.
“"Contar con parques empresariais ben acondicionados é fundamental para facilitar a actividade das empresas, atraer novos investimentos e xerar oportunidades de emprego no rural."
No conxunto da área territorial de Pontevedra, nove parques empresariais resultaron beneficiarios desta liña de axudas, cun investimento total por parte da administración autonómica de preto de 590.000 euros. Estas achegas buscan favorecer a modernización e mellora das áreas empresariais, reforzando a súa capacidade para atraer novas actividades económicas e xerar emprego.
