A iniciativa consistirá nunha retransmisión en directo do fenómeno astronómico desde dous puntos emblemáticos: o Altar do Sol de Alperiz, en Lalín, e a praia das Catedrais, en Ribadeo. O evento contará coa participación do profesor José Ángel Docobo, director do Observatorio Astronómico Ramón María Aller, quen ofrecerá comentarios científicos.
Ambos os dous concellos presentaron esta proposta destacando o seu carácter innovador e colaborativo. A idea xorde, en parte, da necesidade de maximizar as posibilidades de observación ante a incerteza meteorolóxica, buscando asegurar que o fenómeno poida ser visto desde polo menos un dos dous puntos.
“"As nubes son caprichosas, entón tendo a oportunidade de observar a eclipse desde dous sitios temos o dobre de posibilidades de poder velo."
En canto ás condicións de observación, Ribadeo será o punto de Galicia onde o eclipse alcanzará a súa maior duración, cun minuto e 45 segundos de totalidade. Pola súa banda, Lalín será un dos poucos lugares da provincia de Pontevedra desde onde se poderá contemplar o eclipse total, aínda que de forma máis breve, uns 20 segundos, e limitado a determinadas zonas do municipio. O enclave elixido, o Altar do Sol, achega un valor simbólico e patrimonial á experiencia.
Para facilitar o seguimento, instalaranse pantallas xigantes en ambas as localidades, conectadas mediante un sistema de retransmisión en directo. O alcalde de Lalín, José Crespo, explicou que o profesor Docobo narrará os aspectos científicos antes, durante e despois do eclipse. O alcalde de Ribadeo, Dani Vega, subliñou o simbolismo dos espazos escollidos e a importancia da cooperación para proxectar a imaxe turística e cultural dos municipios.
A xornada do 12 de agosto non se limitará ao eclipse solar. Tras a observación, ambos os concellos teñen previsto organizar actividades lúdicas e festivas, para retomar posteriormente a programación coa observación nocturna da choiva de estrelas das Perseidas, cuxo máximo coincide con esa data. Ademais, o profesor Docobo lembrou que o 28 de agosto haberá un eclipse de lúa, ampliando as oportunidades astronómicas do mes.
No plano organizativo, os municipios traballan na preparación de infraestruturas e dispositivos especiais. Lalín habilitará zonas de aparcamento preto do Altar do Sol, mentres que Ribadeo activará un plan específico de tráfico no contorno das Catedrais. Ambos os dous rexedores fixeron un chamamento a outras administracións para colaborar no financiamento do evento, especialmente para a conexión vía satélite que garanta unha retransmisión de calidade.
