O Concello de Valga está a dar pasos para acadar que o Padre Isorna sexa recoñecido co Día das Letras Galegas. Para iso, o goberno local convocou ao tecido asociativo, que respondeu cunha declaración conxunta de apoio asinada por unha vintena de asociacións culturais e veciñais.
Este apoio súmase ás xestións que o goberno valgués, en colaboración coa familia do Padre Isorna, vén realizando ante entidades como a Real Academia Galega e o convento franciscano de Santiago de Compostela.
Xosé Manuel Isorna Ferreirós (Barcia, 1921–2016) destacou polo seu compromiso coa divulgación do galego, sendo unha figura clave para a súa introdución e consolidación na igrexa e na comunicación. Foi recoñecido como o "cura galeguista" polo seu labor na normalización e dignificación do galego no ámbito relixioso e espiritual, chegando a centos de miles de fogares a través da Televisión de Galicia (TVG).
Ademais, cultivou a prosa en galego e contribuíu a espallar a identidade cultural do país. En 1967 foi nomeado membro correspondente da RAG e colaborou coa institución durante case medio século. En 1997 recibiu o título de Fillo Predilecto de Valga e en 2009 doou ao Concello a súa biblioteca privada de 15.000 volumes, que permitiu abrir en 2011 a primeira biblioteca pública de teoloxía de Galicia.
O vindeiro martes levarase a Pleno unha proposta para oficializar a solicitude de que o Padre Isorna sexa o segundo valgués homenaxeado no Día das Letras Galegas, despois de Xesús Ferro Couselo en 1996.
