Os traballos, que comezaron o venres co peche dun carril, implicarán o peche total da vía a partir do martes 12 de maio. Esta medida afecta o tramo entre os puntos quilométricos 0+400 e 0+600, moi próximo ao núcleo urbano de Caldas, e busca garantir a seguridade dos usuarios ante a inestabilidade da calzada.
Unha inspección técnica previa revelou a existencia de importantes oquedades baixo a estrada, nunha zona onde se sitúa un muro de contención de considerable altura. Estas cavidades están a provocar a perda de material de recheo e xa se manifestan con gretas visibles no asfalto, o que levou á institución provincial a actuar de urxencia.
“"Os traballos previstos contan cun investimento estimado de 150.000 euros e inclúen o fresado do asfalto, a retirada de terras ata acadar a base da estrutura de contención, a execución das actuacións necesarias para garantir un drenaxe correcto das augas procedentes dun nacemento natural existente baixo a estrada, así como o recheo, compactado e reposición do firme para recuperar a circulación con plenas garantías de seguridade."
A Deputación coordinou a intervención co Servizo de Transportes da Xunta de Galicia e coas empresas concesionarias para reorganizar os servizos de transporte escolar e regular. Establecéronse rutas alternativas para os autobuses de maior tamaño entre o CEIP San Clemente de César e o centro de Caldas de Reis, pasando por San Clemente, Casaldrago, Cernadas e Carracedo. A duración estimada da actuación é de tres meses.
