A representante do Goberno autonómico destacou en Paderne o apoio do Goberno galego á diversificación da economía azul e á dinamización do rural galego. A visita tivo lugar na parroquia de Souto, onde se atopa o establecemento Bemar do Camiño.
O proxecto, promovido por unha emprendedora e apoiado polo Grupo de Acción Local do Sector Pesqueiro (GALP) Ártabro, consistiu na rehabilitación integral de dúas edificacións tradicionais. A actuación supuxo un investimento total de case 430.000 euros e contou cunha axuda pública de 200.000 euros, financiada a través do Fondo Europeo Marítimo, de Pesca e de Acuicultura (FEMPA) e da Xunta de Galicia.
A iniciativa busca recuperar o patrimonio natural e patrimonial da contorna, situada no trazado do Camiño Inglés a Santiago de Compostela, fomentando un turismo sostible vinculado ao sector pesqueiro local. Inclúe actividades de promoción do patrimonio cultural mariñeiro e colaboracións con entidades do sector.
Belén do Campo salientou que estas actuacións responden aos obxectivos das Estratexias de Desenvolvemento Local Participativo dos GALP, orientadas a consolidar a costa galega como destino turístico, favorecer a diversificación económica e crear emprego.
A delegada puxo en valor o labor do GALP Ártabro, integrado por 44 entidades socias. Informou tamén que na convocatoria de axudas de 2025, o GALP Ártabro apoiou 27 iniciativas cun investimento público superior aos 890.000 euros, e que na de 2026 xa se presentaron 20 iniciativas por 1,6 millóns de euros.
A Xunta destina este ano un orzamento global de 6,9 millóns de euros ás axudas para proxectos dos GALP, cofinanciadas polo FEMPA, para avanzar cara a unha economía azul sostible e crear emprego.
