O Concello de Betanzos fixo público o balance das súas recentes festas patronais de San Roque, que rexistraron cifras de afluencia "impresionantes". Entre os momentos máis destacados, subliñouse a xira a Os Caneiros do pasado día 18, cualificada como "unha das máis multitudinarias nos últimos anos".
A alcaldesa, María Barral, cualificou os resultados de "moi satisfactorios", non só pola alta participación senón tamén pola "repercusión que tiveron fóra do municipio", ademais da "importancia que teñen para a economía local".
Barral recalcou a relevancia das festas de San Roque a nivel autonómico, considerándoas "claramente un referente do verán en Galicia". Tamén sinalou o Globo como "unha das citas máis agardadas e con maior arraigo entre a veciñanza", que tamén atraeu a atención dos turistas.
“"Este ano, a representante das festas foi Myriam Arnoso Roca e o pregón correu a cargo de Dolores Vázquez, betanceira recoñecida co galardón á promoción dos valores por parte do Ministerio de Igualdade. No plano infantil, a representante foi Iris Pena Martínez, que contou co pregón infantil da tamén betanceira Carmen Calvo."
O cartel, deseñado "para todas as idades", atraeu miles de persoas. A alcaldesa agradeceu a participación de formacións musicais como Panorama, París de Noia, Roi Casal, Grupo Elebé 2.0, Origen, The Cruze, Los Satélites, Os Revenidos, Ortiga ou ALGA. Lamentou a cancelación do concerto da Joven Orquesta Sinfónica de Galicia debido ao mal tempo, anunciando que se buscará unha nova data.
En canto á xira a Os Caneiros, indicouse que houbo "menos incidencias que noutras edicións", aínda que se insistiu na necesidade de "concienciación sobre a limpeza e o respecto ao contorno". A rexedora concluíu criticando o estado en que aparece o chan do campo, "con milleiros de quilos de lixo no chan cando hai suficientes depósitos para poder depositalos".
