O pleno do Concello de Curtis aprobou este xoves modificar a relación de postos de traballo (RPT) co obxectivo de axustar as funcións que desempeña o persoal municipal. Esta actualización busca dotar de maior eficiencia ao funcionamento da administración local e afianzar a base xurídica das súas labores.
A modificación revisa postos da unidade de obras e servizos, así como postos de carácter técnico e administrativo. Tamén se melloran as condicións dos peóns do Grupo de Emerxencias Supramunicipal (GES), que pasan agora ao Grupo IV. Ademais, créase un posto de monitor deportivo-adestrador para ampliar a atención dos ximnasios municipais de Curtis e Teixeiro, e increméntase a xornada do posto de asesoría xurídica do Centro de Información ás Mulleres (CIM).
A proposta, elaborada pola mesma empresa que redactou a RPT orixinal, foi aprobada no pleno co voto favorable do Partido Popular e a abstención do Bloque Nacionalista Galego. Previamente, recibiu o visto bo unánime dos representantes do persoal e sindicatos.
Outro punto tratado foi a redución á metade da taxa pola recollida e xestión de residuos para as microempresas. A ordenanza fiscal vixente establecía 392 euros anuais para actividades con menos de 10 traballadores; tras a aprobación por unanimidade, abonarán 200 euros, o que supón unha baixada do 49%.
O alcalde, Javier Caínzos, sinalou que a intención do goberno municipal sería reducir aínda máis as tarifas, pero a lexislación vixente, baseada no principio de “quen contamina paga”, impídeo. "Se a lei permitise que os concellos cofinanciasen o servizo, estudaríamolo", afirmou.
A corporación tamén aprobou a ampliación da delegación de competencias tributarias na Deputación, que xestionará e recadará sancións por infraccións de normas de tráfico e da lei antitabaco, debido ao incremento de boletíns de denuncia.
Debateuse unha moción do BNG para a mellora da atención primaria nos centros médicos de Curtis e Teixeiro. O grupo popular indicou que o Concello xa traslada á Xunta estas necesidades e que existe un plan autonómico para reforzar persoal e infraestruturas.
Finalmente, o BNG presentou mocións de condena polo xenocidio contra o pobo palestino e para incorporar prazas de bedeis nos colexios de Teixeiro e Curtis. A urxencia de ambas foi desestimada por xa teren sido votadas e aprobadas en sesións anteriores.
