A resolución da Consellería de Medio Ambiente e Cambio Climático non prevé impactos significativos na contorna, sempre que se cumpran os condicionantes fixados no informe ambiental e na documentación avaliada.
As instalacións ocuparán unha superficie de 5.460 m2 e constarán de seis bungalows de dúas prazas cada un e un módulo de servizos con aseos, recepción, lavandería e un posto de venda de produtos de primeira necesidade.
O proxecto, localizado na parroquia de Cruces, tamén inclúe obras de acondicionamento do terreo e urbanización interior, como sendeiros, un vieiro interior perimetral e unha zona de aparcamento con 16 estacionamentos sinalizados con balizas led e pavimento drenante.
O informe de impacto ambiental (IIA) foi elaborado no marco dun procedemento de avaliación simplificada, sen que se recibisen alegacións durante a participación pública e tras consultar a 10 organismos.
As avaliacións consideran viable o proxecto, sempre que se cumpran os condicionantes establecidos en relación á protección da atmosfera, poboación e saúde; augas e leitos fluviais; solo e infraestruturas; fauna e valores naturais; patrimonio cultural; integración e restauración paisaxística; e xestión de residuos.
A resolución foi remitida á Axencia de Turismo de Galicia e faise pública hoxe no Diario Oficial de Galicia (DOG). O promotor, Wayrest Hospitality & Estates, SL, deberá obter todas as autorizacións e licenzas necesarias para desenvolver o proxecto.
