O goberno municipal instou ás empresas a cesar de xeito inmediato estas actividades e requiriulles diversa documentación, iniciando un procedemento ante dúas infraccións cualificadas como graves.
A actuación municipal produciuse tras recibir diversas queixas veciñais. Tras os avisos, realizáronse visitas de comprobación que constataron sacas e acopios de madeira na vía municipal en dous puntos do concello. Un deles, entre o lugar dos Vilardois e a presa do Mandeo; o outro, entre o lugar de Montouto e da Graña, na parroquia de Foxado.
En ambos os casos, as empresas implicadas carecían da autorización necesaria para levar a cabo estas operacións.
A Ordenanza Municipal Reguladora do Depósito, Carga e Transporte de Madeira de Tala establece a obrigatoriedade de comunicar previamente a corta de plantacións forestais no termo municipal, ou o emprego de viais municipais para transportar a madeira, mesmo se a tala afecta a outros concellos.
O obxectivo desta normativa é minimizar os danos que esta actividade económica pode causar á vía pública, xa que a maquinaria empregada e a natureza dos traballos adoitan xerar importantes desperfectos nas estradas e pistas de titularidade municipal.
