A xornada final do encontro serviu para destacar tanto a diversidade das propostas audiovisuais presentadas na sección oficial como o impulso a novas formas de creación na rede, especialmente aquelas desenvolvidas en lingua galega.

No ámbito internacional, o Premio á Mellor Serie, dotado con 800 euros, foi para T-REX (Canadá, 2024), unha obra que explora os conflitos da masculinidade a través de tres amigos de infancia. O Premio á Mellor Dirección, con 200 euros, recaeu en Ruby (Francia, 2025), unha serie sobre unha superheroína queer. Pola súa banda, o Premio do Público, de 400 euros, foi para The Struggle for Existence-S2 (Dinamarca, 2025), unha comedia que aborda os desafíos da masculinidade contemporánea.

O Xurado Novo, que tamén outorgou 400 euros, distinguiu a Eyes In The Woods (Canadá, 2025), un misterio paranormal queer ambientado nun bosque. Os xurados estiveron compostos por profesionais do sector e novos talentos.

En canto aos premios dedicados ao contido dixital en galego, o festival subliñou a vitalidade e personalidade dos proxectos na lingua propia. O Premio á Mellor Canle, de 600 euros, foi para Miradenovo, pola súa capacidade de conectar con diversos públicos e a súa visión na creación de contido específico. O Premio á Mellor Creadora ou Creador, tamén de 600 euros, recoñeceu a @Antontísimo polo seu carisma e a súa aposta por un internet sen artificios.

Ademais, o Premio á Produción de Contido Dixital en Galego, dotado con 3000 euros, foi concedido ao proxecto Crossbooking Castelao, un microdrama baseado na obra de Castelao. Con este galardón, o festival reafirma o seu compromiso co apoio á creación dixital en galego, fomentando o desenvolvemento de novas propostas para o ámbito en liña.