O Goberno galego impulsou un Plan estratéxico de eficiencia enerxética para as estacións de autobuses da comunidade, cun investimento total estimado de 7,7 millóns de euros. Este proxecto, do que o Consello da Xunta tomou razón o pasado luns, busca transformar 19 terminais en infraestruturas máis eficientes e confortables para usuarios e persoal.

As estacións, construídas entre 1987 e 2003, presentan deficiencias na súa envolvente e sistemas enerxéticos obsoletos. Por iso, o plan abordará a rehabilitación enerxética destas instalacións, adaptándoas ás normativas actuais e mellorando a calidade do servizo ofrecido á cidadanía.

A estratexia divídese en dúas fases. A primeira, que se desenvolverá entre este ano e 2028, centrarase en seis estacións consideradas prioritarias: Carballo, Ponteareas, Noia, Sarria, Lalín e Sanxenxo. Para esta etapa, prevese un orzamento de case 3,8 millóns de euros.

A segunda fase, que comezará a partir de 2027, incluirá as 13 estacións restantes, cun investimento superior aos 3,9 millóns de euros. Entre elas atópanse Padrón, O Grove, Monforte de Lemos, Viveiro, Burela, Gondomar, Xinzo de Limia, Cambados, Foz, Ribadeo, O Barco de Valdeorras, Chantada e Mondoñedo.

As actuacións previstas abranguen o illamento de fachadas e cubertas, a substitución de carpintarías, o control solar, a mellora da hermeticidade, a instalación de iluminación eficiente, sistemas de climatización renovables, ventilación e paneis fotovoltaicos. Esta iniciativa enmárcase no compromiso do Goberno galego coa redución da pegada de carbono e o avance cara a un modelo enerxético máis sostible, en liña cos obxectivos dos fondos europeos Feder 2021-2027.