O Goberno local da Coruña contratará asistencia técnica para deseñar o seu primeiro Plan de Normalización Lingüística, un documento que guiará as políticas municipais sobre a lingua galega durante os próximos cinco anos.
O Concello sinala que a "situación do galego no conxunto do país fai especialmente necesaria unha actuación decidida" para frear o seu declive, facendo referencia aos datos do Instituto Galego de Estatística (IGE) que mostran unha caída de falantes, especialmente entre a mocidade. Na Coruña, tan só un 4,52% da poboación fala sempre en galego, mentres que o 84,52% fala maioritariamente en castelán.
Este plan, que tamén é unha das medidas incluídas no pacto de investidura entre o PSOE e o BNG, desenvolverase a través dunha diagnose sociolingüística que incluirá unha enquisa telefónica a entre 800 e 1.200 veciños. A análise detallará a situación do galego por barrios, idades, niveis de estudos e orixes.
A enquisa abordará a competencia lingüística autopercibida, o inicio e transmisión da lingua, os usos habituais e as actitudes cara ao galego. Tamén se analizará a exposición á lingua a través de centros educativos, redes sociais e o ámbito laboral, así como usos persoais que van máis aló dos datos que ofrece o IGE.
Ademais, avaliaranse os usos do galego dentro do propio Concello, incluíndo as intervencións dos concelleiros e concelleiras e a comunicación do persoal na atención cidadá. O informe tamén incluirá entrevistas con "axentes chave" e reunións con grupos sectoriais.
O plan, cunha vixencia de cinco anos e un orzamento base de case 50.000 euros, buscará facer do galego a lingua habitual do Concello, garantir o dereito dos veciños a vivir en galego e aumentar as súas funcións sociais. A iniciativa coincide co novo Plan de Normalización Lingüística a nivel autonómico.
