O obxectivo desta presentación, celebrada na capital española, foi dar a coñecer os principais atractivos do territorio galego como unha proposta diferenciada para viaxeiros que buscan experiencias auténticas, sostibles e de calidade. O acto contou coa presenza do presidente da Mancomunidade, José Carlos Vidal, acompañado polos alcaldes de Ribeira, María Sampedro; de Boiro, José Ramón Romero; e de Rianxo, Julián Bustelo, ademais da xerente da entidade, Fátima Cachafeiro.
Durante o encontro, ao que acudiron trinta representantes de axencias de viaxes, José Carlos Vidal puxo en valor a riqueza paisaxística e natural da comarca, a conexión entre mar e montaña, e a posibilidade de gozar de experiencias afastadas da masificación. Subliñou tamén a calidade da gastronomía local, os produtos do mar da ría de Arousa, a tradición pesqueira e marisqueira, así como o crecente interese pola oferta enoturística e a excelencia dos seus viños.
Tras a presentación, os asistentes participaron nunha cata comentada de viños da Indicación Xeográfica Protexida Terras do Barbanza e Iria. A xornada concluíu cun cóctel promocional que permitiu aos participantes seguir descubrindo os sabores da comarca e favorecer o intercambio de impresións e futuras colaboracións.
Esta acción promocional, enmarcada na estratexia de posicionamento en mercados nacionais prioritarios, aposta por un modelo turístico baseado na calidade e a sustentabilidade. A iniciativa foi posible grazas ao convenio de colaboración entre a Mancomunidade e a Axencia Turismo de Galicia, co obxectivo de fortalecer a visibilidade do destino e contribuír á súa comercialización.
