O Concello de Ames xa está a aplicar medidas para reducir o consumo de auga, tanto a particulares como en servizos municipais. Pola súa banda, o Concello de Santiago non prevé por agora iniciar estas restricións, aínda que recoñece unha baixada no caudal do río Tambre, fonte de abastecemento para ambos os municipios.
En canto á seguridade, a Confederación Española de Policía matiza o aumento de axentes anunciado pola Delegación do Goberno e o Concello compostelán. Afirman que o único reforzo real para os meses de verán será a Unidade Antidisturbios, que desprazará axentes desde A Coruña e Vigo para vixiar a contorna da Catedral.
Ademais, o PP de Santiago propuxo o uso de Bizum para o pago de diversas taxas e trámites municipais. Desde o goberno local, no Pazo de Raxoi, responden que é unha posibilidade que se está a estudar para o futuro.
