O informe, elaborado a petición do concelleiro de Medio Ambiente e Camiño de Santiago de Touro, Darío Rey Suárez, sinala que as autorizacións outorgadas á mercantil Cobres San Rafael no contorno da ruta xacobea deberían quedar sen efecto. Isto baséase no artigo 172 da Convención do Patrimonio Mundial, que esixe consulta obrigatoria coa Unesco ou o Icomos para calquera actuación sobre bens declarados Patrimonio Mundial ou as súas zonas de protección.
O documento destaca que "non consta" que se seguiran estas directrices, o que representa un grave risco para os bens protexidos. Ademais, subliña a ausencia de estudos de impacto patrimonial ou outras autorizacións específicas relacionadas co proxecto, nin por parte dos concellos afectados, nin da Xunta, nin do Goberno central. O Icomos conclúe, polo tanto, que se "incumpriron diferentes determinacións de carácter procedimental, algunhas delas fundamentais".
O organismo tamén recalca a importancia das avaliacións de impacto patrimonial, que deben comezar "desde o mesmo momento en que se considere que calquera actuación ou proxecto poida afectar ao Patrimonio Mundial". A entidade considera que "non abonda con cumprir un trámite de exposición pública" para garantir o cumprimento legal.
Non abonda con cumprir un trámite de exposición pública para dar conformidade a un dereito establecido por un texto legal.
Como recomendación, o Icomos insta as autoridades a realizar unha Avaliación de Impacto Patrimonial "independente" que analice en profundidade os impactos, especialmente os visuais, estude alternativas, propoña medidas de mitigación e conte coa participación das comunidades locais. Tamén suxire formalizar unha mesa de traballo conxunta para eliminar os impactos sobre a ruta.
Pola súa banda, Cobres San Rafael afirmou que o proxecto da mina "non afecta" ao Camiño de Santiago nin á súa área de protección. Fontes da empresa indicaron que esta conclusión está xustificada na Avaliación de Impacto Ambiental e na documentación técnica presentada ante as administracións.
