O Consello Internacional de Monumentos e Sitios (Icomos), órgano asesor da UNESCO, urxe a anulación dos permisos concedidos para o proxecto mineiro en Touro (A Coruña). A petición xorde dun informe técnico encargado polo concelleiro delegado para a mina no Concello de Touro, Darío Rey, tras constatar a falta de xestións previas sobre o impacto no Camiño de Santiago.
O informe de Icomos é contundente e suxire que se "saltaron todos os procedementos" na tramitación do proxecto. A principal advertencia é que, de seguir adiante, o Camiño Francés podería perder o seu recoñecemento como Patrimonio da Humanidade pola UNESCO. O concelleiro Darío Rey sinalou que a Xunta debería emitir un informe negativo e "volver á casilla de partida".
Ademais do risco para a ruta xacobea, o proxecto presenta "múltiples eivas" relacionadas coa auga e os dereitos da veciñanza. Darío Rey subliñou a necesidade de estudos independentes, xa que a información actual adoita proceder de "estudos de parte por parte da empresa", e lamentou que o estudo pertinente sobre o impacto "non se fixo".
