A cita gastronómica de Allariz consolídase coa participación de 22 establecementos locais e a carne de boi como gran protagonista. Como atractivos principais, o concurso estreará un xurado profesional para elixir a mellor tapa profesional, mentres se mantén o premio á Mellor Tapa co voto popular. Ademais, haberá unha ampla programación de cantos de taberna e música de rúa.
As XV Xornadas de Carne de Boi arrancarán o vindeiro 25 de setembro e prolongaranse ata o 12 de outubro. O obxectivo é dinamizar a economía local, potenciar os recursos propios e premiar o apoio de veciños e visitantes. Durante este período, poderanse degustar as tapas a un prezo popular de 3 euros en establecementos como A Micalla, A Taberna do Milo, Café Tapería A Muralla, Fio de Liño, Bule Bule, Pepiño de Allariz, Que Quilombo Güey, Fogar dos Maiores, Casa Pepiña, A Tenda do Pepiño, Roi Xordo, Xeado o Avó, Cafetería Camping, O Xardín, Casa Zirall, Adega Tapas e O Patio da Lombarda.
O recoñecemento á “Mellor Tapa 2026” decidirao o público a través da votación popular. Como novidade, a programación contará cun xurado profesional que valorará as propostas e emitirá o seu propio veredicto.
Cada chuletón de boi vendido durante as xornadas contará cun distintivo especial numerado. A organización convida a compartir a experiencia e o número do chuletón nas redes sociais etiquetando ao concello.
A oferta gastronómica complétase con menús e pratos especiais de carne de boi dispoñibles en Acea da Costa, Bule Bule, Pepiño de Allariz, Casa Rural Vilaboa, Casa Pepiña, Orraca, Bodegón Portovello, Roi Xordo, Fogar do Santiso, Adega Tapas e Cafetería Camping.
Complementariamente, o concello ofrecerá degustacións gratuítas no Mercado da Reserva da Biosfera os sábados 26 de setembro (Tataky de boi), 3 de outubro (Croqueta de boi guisado) e 10 de outubro (Paté de fígado de boi co shiitake), a partir das 12:30 horas.
O concurso premia a participación con cartillas de votación. A primeira persoa que complete a tarxeta cidadá e prove todas as tapas levará 100 euros para gastar no comercio local. Entre todas as cartillas completas sortearase un vale de 300 euros. Tamén se sortearán tres vales de 100 euros entre quen proben polo menos 5 tapas. O sorteo final será o sábado 24 de outubro, ás 11:00 horas, no Mercado da Reserva da Biosfera, onde se anunciarán os fallos e gañadores.
Incorporarase unha enquisa de satisfacción a través dun código QR nas cartillas e dípticos para coñecer as impresións da veciñanza e visitantes.
As tardes e noites dos venres e sábados, a partir das 20:30 horas, haberá dinamización de rúa con música e cantos de taberna. Destacan as actuacións de Xolda de Allariz, As Xeitosiñas de Baltar, De Pé Feito, As Cen Tolas de Ambía, As Netas do Arnoia, A Murga Achicoria.
A alcaldesa de Allariz, Cristina Cid, subliñou que estas 15 edicións consolidan o evento como unha cita imprescindible para a dinamización económica e a posta en valor dos produtos locais. A concelleira de Promoción Económica, María López, animou a participar para encher as rúas de vida e poñer en valor o talento da hostalaría.
