A iniciativa, impulsada pola Concellería de Benestar Social, busca recoñecer a achega das persoas maiores á sociedade. A programación inclúe propostas variadas que abranguen desde o cinema galego ata actividades ao aire libre e obradoiros de artesanía.
O calendario comeza o 24 de setembro coa proxección do filme O silencio herdado na Casa da Cultura. O 1 de outubro, coincidindo co Día Internacional das Persoas Maiores, celebrarase unha camiñada seguida dun xantar campestre, para o que é preciso inscribirse antes do 30 de setembro.
A oferta complétase cunha viaxe cultural ao Baixo Miño o 8 de outubro e un obradoiro de cerámica titulado Pegadas de Barro o 15 de outubro no Fogar dos Maiores. Esta última actividade será impartida pola Asociación Estivadinha.
As persoas interesadas en participar poden formalizar a súa inscrición de xeito presencial no Fogar dos Maiores, situado na rúa A Barreira, chamando ao teléfono 988 554 059 ou enviando un correo electrónico a fogardosmaiores@allariz.gal.
