A localidade de Allariz será o escenario o vindeiro sábado, 12 de setembro, da IX Feira dos Produtos Apícolas. Este evento, xa consolidado no calendario municipal, busca promover o sector apícola, pór en valor o mel e os seus derivados, e concienciar sobre a importancia das abellas no noso ecosistema.
Na presentación oficial, celebrada hoxe, participaron Bernardo Varela, concelleiro de Medio Ambiente; María López, concelleira de Promoción Económica; e Antonio García e Afonso Vasalo, en representación da Asociación Galega de Apicultura (AGA). Todos destacaron a relevancia de apoiar o produto local de calidade e ofrecer espazos de divulgación e lecer.
A feira desenvolverase na Praza do Matadoiro en horario continuado de 10:00 a 20:00 horas. A programación inclúe diversas actividades ao longo do día.
Pola mañá, a partir das 12:00 horas, terá lugar o obradoiro «Tres en raia apícola», impartido por Marga Miguens, para o que se require inscrición previa no correo alacenadoulla@hotmail.com.
Na parte da tarde, a partir das 16:00 horas, Joaquín Lozano ofrecerá unha charla sobre «Introdución á apicultura». Seguiralle ás 18:00 horas o espectáculo «Unha noite no muíño…», a cargo de A Trastenda dos Contos.
A xornada pecharase cunha charla-degustación de queixo e mel ás 19:00 horas, a cargo de Alberto Fernández, e un sorteo de dúas cestas con produtos da feira ás 20:00 horas.
O Concello de Allariz convida a todas as persoas interesadas a achegarse o vindeiro 12 de setembro para gozar dunha xornada divulgativa e festiva arredor da apicultura.
