O director xeral de Familia, Infancia e Dinamización Demográfica, Jacobo Rey, participou esta mañá nun encontro cos nenos e nenas participantes no campamento de verán da Fundación Juan Soñador en Allariz. Durante a visita, reafirmou o compromiso da Xunta de Galicia con esta entidade social, cuxo labor se centra en fomentar a igualdade de oportunidades entre todos os menores.
O Executivo autonómico leva máis dunha década colaborando coa institución. Esta fundación desenvolve un programa socioeducativo, de ocio e tempo libre, e de atención integral dirixido a nenos, nenas e adolescentes que se atopan en situación de risco, desamparo ou exclusión social.
Jacobo Rey destacou que o compromiso da Xunta é traballar para que Galicia continúe sendo un referente na atención á infancia. Para iso, poñen a disposición das familias recursos e servizos fundamentais, con especial atención á mellora da situación da mocidade máis vulnerable.
