Todo está listo para o II Half Triatlón Ribadeo, que se celebrará este sábado, 5 de setembro. O evento, organizado por Laetus Sport coa colaboración do Concello ribadense, contará coa participación duns 250 deportistas.
Segundo explican os organizadores, trátase dunha proba de carácter nacional puntuable para o ranking nacional de media e longa distancia, e na que se disputará tamén o campionato galego nas modalidades Half Aquabike e Half Triatlón.
A proba comezará na praia dos Bloques cun percorrido de natación de 1.000 metros para a distancia Short e 2.000 para a distancia Half. Posteriormente, haberá un percorrido ciclista de 40 quilómetros e unha carreira a pé duns 10 quilómetros. Toda a información está dispoñible na páxina oficial www.halftriatlonribadeo.com.
O concelleiro de Deportes, Francisco José Silvent, sinalou que "esta proba está considerada un dos maiores expoñentes de turismo deportivo, xa que a maioría dos Half Triatlón que se celebran en España, unha vez consolidados, superan os 500 participantes. Son deportistas que acostuman a viaxar en familia e a permanecer na localidade un par de días, co que iso supón para os negocios e para a economía local".
O II Half Triatlón suporá diferentes modificacións no tráfico rodado ao longo de todo o sábado. Por iso, pídese á veciñanza e visitantes que estean atentos ás sinais e ás indicacións da Policía Local, de Protección Civil e dos voluntarios e voluntarias que colaboran co evento.
No Concello déronse cita o alcalde, Dani Vega, o director territorial de Deportes da Xunta, Manuel Otero, o técnico municipal de Deportes, Iván López, e Víctor Martínez, xerente de Laetus Sport.
