A xustiza galega deu a razón ao Concello de Cervo na reorganización do Grupo de Emerxencias Supramunicipal (GES). O Tribunal Superior de Xustiza de Galicia (TSXG) desestimou na súa totalidade o recurso presentado pola sección sindical da CNT, avalando así a sentenza previa do Xulgado do Social número 3 de Lugo.

Esta resolución supón un novo respaldo xudicial ás decisións do goberno local, confirmando que a actuación municipal se realizou con pleno respecto á legalidade e desmentindo as acusacións sindicais. O tribunal considera acreditada unha causa organizativa real e suficiente para xustificar a modificación substancial das condicións de traballo, motivada pola finalización do convenio que sustentaba o funcionamento do GES.

A sentenza rexeita expresamente as alegacións sobre vulneración de dereitos fundamentais, descartando represalias contra os traballadores ou a actividade sindical da CNT. Conclúe que as decisións se basearon exclusivamente en criterios organizativos obxectivos e razoables, e que durante a negociación houbo un auténtico período de consultas sen que se poida apreciar mala fe por parte da Administración local.

A alcaldesa de Cervo, Dolores García Caramés, valorou moi positivamente a sentenza, subliñando que a prioridade sempre foi "garantir a seguridade dos traballadores e a correcta prestación dun servizo esencial para a veciñanza". Engadiu que as decisións adoptadas responderon a "razóns organizativas reais e á necesidade de dar resposta a unha situación complexa", e non a "interpretacións interesadas".

García Caramés tamén lembrou que se dirixiron á Deputación de Lugo, como administración competente, para atender as demandas e evitar a medida, pero ante a falta de solucións, o Concello actuou con responsabilidade. A alcaldesa concluíu que esta nova sentenza "reforza a posición mantida polo Concello durante todo este proceso" e confirma que "sempre actuamos defendendo o interese xeral, a seguridade dos profesionais e a continuidade dun servizo esencial para a cidadanía".