Traballadores da base forestal de Viveiro contactaron esta semana para denunciar as condicións que describen como de "hacinamento" no local actual, situado en dependencias da Dirección Territorial de Mar en Celeiro. A Consellería de Medio Rural recoñece a situación e afirma que está a traballar na procura de "solucións de infraestruturas" para ofrecer ao persoal un espazo "propio" e axeitado ás súas necesidades.

Segundo explican os afectados, o espazo actual, duns 20 metros cadrados, debe ser compartido por preto de 25 persoas de catro brigadas diferentes. A isto súmanse as 11 taquillas dispoñibles, insuficientes para todo o persoal, e dous baños (un masculino e un feminino) que tamén son utilizados puntualmente por axentes, técnicos e emisoristas.

A reducida dimensión do local fai que as condicións sexan "incómodas" para comer, descansar ou ducharse. Un traballador sinala que "hai unha mesa na que poden comer como máximo catro persoas" e que, tras unha intervención, a espera para usar a única ducha dispoñible para homes ou mulleres pode ser de "catro ou cinco diante", o que obriga a "ir para a casa sen duchar".

Os brigadistas xa trasladaran as súas queixas a través da súa representación sindical hai tempo, pero ata o momento non se produciron melloras nas instalacións, o que mantén a preocupación polo estado da base forestal.