A Consellería de Medio Ambiente e Cambio Climático, a través de Augas de Galicia, reforza a seguridade cidadá na comarca da Mariña coa instalación de 21 paneis divulgativos. Estes sinalizan áreas de risco potencial significativo de inundación (Arpsi) nos ríos Ouro, ao seu paso por Foz, con 9 elementos, e Batán, no concello de Lourenzá, con 12.
O principal obxectivo desta iniciativa é sensibilizar á poboación sobre os perigos asociados a episodios de chuvia intensa e dar a coñecer as medidas preventivas e pautas de actuación recomendadas. Estas accións enmárcanse no Plan de Xestión de Risco de Inundación (PXRI) da Demarcación Hidrográfica Galicia-Costa, que identifica estas zonas como de alta perigosidade.
A colocación destes paneis forma parte do Plan estratéxico de divulgación das áreas de risco (Pedarpsi), dando continuidade a traballos similares xa realizados noutras 39 localidades galegas. A sinalización combina formatos xerais, con información detallada e protocolos de actuación, e infantís, adaptados aos máis novos.
O investimento para a sinalización en Foz, con 9 carteis na contorna do río Ouro, foi de 3.476,25 euros. Para os 12 elementos no río Batán destináronse 4.635 euros. Ambas actuacións forman parte dun contrato global de preto de 700.000 euros para concienciación e divulgación do risco de inundación.
Ademais da sinalización, Augas de Galicia desenvolve obradoiros en centros educativos próximos a estas áreas de risco para concienciar ás novas xeracións sobre os efectos das accións humanas nas contornas fluviais e o funcionamento das canles de auga.
