A festa, que xa conta cunha longa traxectoria de case medio século, dedicará tres xornadas á gastronomía, á cultura e á participación veciñal. A programación inclúe cociña en directo, degustacións, concertos, humor e actividades vinculadas ao patrimonio rural, coa pataca como fío condutor para reivindicar o traballo das persoas produtoras e a riqueza agroalimentaria da zona. A edición deste ano estrea ademais un novo equipamento municipal que servirá polbo e orella durante todo o evento.
A xornada inaugural deste venres comezou coa tradicional feira e, pola tarde, os xogos populares ofrecerán propostas para todas as idades. A noite estará marcada polo humor co espectáculo Xacobeo de veteráns, con Pepo Suevos e Dani Dopazo, seguido de cantos de taberna. O Pataca Fest na Praza do Toural traerá a música con Tapa D’Orella, Gramola e DJ Kike Varela.
O sábado estará centrado na gastronomía co showcooking e degustación a cargo de Begoña Vázquez, acompañado de música tradicional. A tarde continuará con xogos populares, demostracións culinarias e charlas. Destaca a actuación do grupo portugués de concertinas Sons do Rio e, pola noite, o concerto principal da artista Sés. A noite culminará coa proposta de 'A noite dos ovos fritidos con patacas e chourizo asado' por 6 euros.
O domingo concentrará os actos centrais coa animación musical do grupo de bombos de Balteiro, o desfile «O rural e a pataca» e o acto institucional da 47ª edición. O xantar popular, cun menú de empanada e churrasco, terá un prezo de 20 euros. A xornada de tarde inclúe máis cociña en directo, xogos populares, unha foliada e a actuación de Bandiños Band, ademais da entrega de premios dos concursos.
A Festa da Pataca enmárcase na estratexia municipal de promoción do produto local e dinamización do medio rural. Dende 2026, Vilar de Barrio forma parte da Rede Nacional de Pobos Produtores de Pataca, fortalecendo a cooperación e as oportunidades de intercambio para o sector, apoiando a produción agraria, o comercio, a hostalaría e o turismo rural.
