O tribunal considerou probado que ambos os procesados manteñen "unha relación de inimizade dende hai xa moitos anos", con incidentes violentos previos. Un dos veciños atacou ao outro cunha pala tras unha discusión, o que provocou a reacción do agredido.
O home agredido, "temendo pola súa vida ou a resultar ferido", defendeuse cunha azada e asestoulle un forte golpe na cara ao seu atacante. A Audiencia Provincial de Lugo sinalou que actuou "con necesidade de defenderse ante o ataque" pero tamén "con intención de menoscabar a integridade do seu atacante".
As consecuencias do golpe foron graves, xa que a vítima perdeu a visión dun ollo e sufriu outras lesións. Por iso, o condenado deberá indemnizalo con 58.145,16 euros. O tribunal rexeitou cualificar os feitos como tentativa de asasinato ou homicidio.
A Audiencia considera a ambos os veciños autores de delitos de lesións e rexeita a concorrencia de alevosía, ensañamento ou eximente por medo insuperable. Non obstante, aprecia no acusado que repeliu o ataque a eximente incompleta de lexítima defensa. A sentenza aínda non é firme e pode ser recorrida ante o Tribunal Superior de Xustiza de Galicia.
A disputa orixinouse por unha vella rifa polo uso dun camiño na parroquia de Santo André de Logares, onde pastan as vacas. Un dos condenados xa ingresara en prisión en 2011 por disparar contra a cuadra do outro acusado, que estaba dentro co seu pai.
A un dos veciños molestábanlle as deposicións das vacas no camiño próximo ao seu domicilio. Nos días previos ao incidente, chegara a clavar táboas con puntas cara arriba e botar auga con xeo para dificultar o paso dos animais, segundo indicaron veciños da zona.
