A Biblioteca Central Rialeda, en Oleiros, recibiu un premio do Ministerio de Cultura polo seu programa de actividades de promoción da lectura e dinamización cultural. Esta distinción recoñece o esforzo do Concello de Oleiros por ofrecer unha programación ampla e diversa, orientada a persoas de todas as idades co obxectivo de garantir a igualdade de oportunidades no acceso aos libros e á lectura.
Entre as actividades destacadas atópanse obradoiros de ilustración sobre seres da mitoloxía galega e de cómic, impartidos polo ilustrador Miguel Cuba; recitais de poesía e música, contacontos, visitas guiadas á biblioteca e propostas específicas para conmemorar datas sinaladas como o Día das Letras Galegas, o Día de Rosalía, o Día da Poesía, o Día da Muller ou o Día do Libro Infantil e Xuvenil.
O programa tamén inclúe a Hora do Conto, obradoiros, recomendacións literarias en RadiOleiros, actividades coa terceira idade, tertulias literarias, exposicións bibliográficas e iniciativas como Ler para saber: a ciencia. Esta programación busca achegar os libros a toda a cidadanía e converter as bibliotecas en espazos vivos de encontro, aprendizaxe e participación cultural.
Este recoñecemento subliña o compromiso do Concello de Oleiros cunha rede de bibliotecas públicas activa, próxima e accesible, que traballa durante todo o ano para fomentar o hábito lector e asegurar que a cultura estea ao alcance de todas as persoas.




