A alcaldesa da Coruña, Inés Rey, comunicou aos veciños de Xuxán a reordenación do transporte público que permitirá que o barrio dispoña dunha conexión directa coa rede urbana. A Compañía de Tranvías da Coruña será a encargada de executar a modificación do percorrido da liña 4.

Esta ampliación suporá que a liña 4, que ata agora finalizaba no Barrio das Flores, acceda a Xuxán pola rúa A Cantera. Percorrerá as dúas principais avenidas do barrio, incorporando tres novas paradas que mellorarán a mobilidade dos residentes e a súa conexión co resto da cidade.

Dúas das novas paradas situaranse na avenida das Fresas de Eirís, unha entre as rúas Campo de Galán e A Viña e outra na confluencia coa rúa Milagros Rey. A terceira parada estará na avenida de Xuxán. Ademais, a nova ruta aproveitará dúas paradas xa existentes no viaduto que une as rotondas entre a avenida de Monelos e o acceso a Xuxán, conectando coas liñas 1A e 12A.

A ampliación do percorrido non afectará ás frecuencias actuais da liña 4, xa que o servizo se reforzará coa incorporación dun autobús adicional.