O incidente ocorreu sobre as 14.30 horas cando dous coches que circulaban pola Nacional 6 colisionaron. Un dos vehículos saíu voando, deu varias voltas de campana e terminou a uns 25 metros do punto inicial do choque. Segundo testemuñas, un dos coches puido equivocarse de saída e impactou lateralmente contra o outro, estrelándose na isleta contra dous sinais antes de saír despedido.
Os implicados puideron saír dos vehículos por si mesmos e polo menos unha persoa foi trasladada en ambulancia. Ata o lugar desprazáronse os Bombeiros de Betanzos, a Garda Civil de Tráfico e Urxencias sanitarias.
O cruce de Queirís é coñecido por ser un punto perigoso onde se teñen rexistrado numerosos accidentes. Existe unha demanda histórica de melloras na seguridade neste tramo da Nacional VI, que xa foi obxecto de estudos e proxectos de remodelación dende 2009, incluíndo a proposta de construír unha glorieta.
