O municipio coruñés de Sada súmase á campaña de verán denominada “Un alento de vida”, promovida pola Axencia de Doazón de Órganos e Sangue (ADOS), co obxectivo de incrementar a participación cidadá durante os meses estivais.
Para facilitar a colaboración dos veciños e veciñas, unha unidade móbil da Axencia estará presente o martes 14 de xullo diante da Casa da Xuventude. O horario de doazón será de 09:45 a 14:30 e de 15:45 a 21:00 horas.
Esta iniciativa achegará a posibilidade de doar sangue a máis de 170 concellos galegos ata finais de agosto, coa meta de recoller ao redor de 22.000 doazóns para garantir o abastecemento nos hospitais galegos, especialmente sensible no verán.
A Axencia de Doazón de Órganos e Sangue lembra que a necesidade de 400 doazóns diarias mantense durante todo o ano, incluídos os meses de vacacións, cando a deslocalización dos doantes habituais pode dificultar o subministro.
A campaña busca concienciar sobre a importancia de doar sangue como oportunidade de curación para moitos enfermos, subliñando que o xesto solidario dos doantes é fundamental para o tratamento de pacientes no sistema público de saúde.
A Axencia agradece a implicación da corporación municipal de Sada e o compromiso dos seus veciños. No ano 2025, o municipio rexistrou unha taxa de 29 doazóns por cada 1.000 habitantes, un índice inferior á media galega (39/1.000), polo que se busca incrementar progresivamente a participación.
Calquera persoa maior de 18 anos, con máis de 50 quilos de peso e sen enfermidades transmisibles polo sangue pode participar. Para máis información, ADOS dispón do portal web ados.sergas.gal, redes sociais e o teléfono gratuíto 900 100 828.
