O concello de Sada súmase á campaña de verán “Un alento de vida” que desenvolve a Axencia de Doazón de Órganos e Sangue (ADOS), co obxectivo de fomentar a participación cidadá durante os meses estivais.
Para facilitar a colaboración dos veciños e veciñas, unha unidade móbil da Axencia estará estacionada o martes 14 de xullo diante da Casa da Xuventude das 09:45 ás 14:30 e das 15:45 ás 21:00 horas.
Esta iniciativa achegará a doazón a máis de 170 concellos galegos ata finais de agosto, coa meta de obter ao redor de 22.000 doazóns de sangue e garantir o abastecemento nos hospitais, xa que se precisan 400 doazóns diarias.
A campaña subliña a importancia de doar sangue, mesmo no verán, xa que o xesto solidario dos doantes posibilita o tratamento de moitos doentes atendidos no sistema público de saúde.
A Axencia agradece á corporación municipal de Sada a súa implicación e o compromiso coas campañas de doazón, así como o recoñecemento aos veciños e veciñas que xa doan. En 2025, o municipio coruñés acadou 500 doazóns (29 por cada 1.000 habitantes), un índice por baixo da media galega (39/1.000), polo que se busca incrementar a participación.
Calquera persoa maior de 18 anos, que pese máis de 50 quilos e non padeza enfermidades transmisibles polo sangue pode participar. Para máis información, ADOS dispón do portal web ados.sergas.gal, redes sociais e o teléfono gratuíto 900 100 828.
