Este novo espazo lúdico, deseñado para nenos e nenas de 0 a 12 anos, forma parte da estratexia municipal para revitalizar e ampliar as zonas de xogo na cidade. A intervención, situada preto de Riazor, prevé a instalación de elementos como paneis ópticos e de rolo, ademais de xogos adaptados para menores con mobilidade reducida, incluíndo unha randeeira e un carrusel accesibles. A estrutura ubicarase na explanada do segundo nivel da praza.
O concelleiro de Infraestruturas, Jesús Celemín, destacou que "investir na mocidade é investir no benestar da familias da Coruña". Subliñou o compromiso do Goberno de Inés Rey por ofrecer "espazos modernos, públicos e totalmente dotados dos mellores elementos de xogo posibles", cunha cidade que planifica "pensando nos mozos e mozas" para ser "feliz e próspera".
A obra, cun prazo de execución duns 12 meses, atópase na súa fase inicial. Complementariamente, a actual zona de xogos será substituída por unha área de calistenia con barras e bancos para exercicios, convertendo a localización nun referente de ocio ao aire libre. A superficie total destinada á zona de xogo será de 821 m², mentres que a área de calistenia ocupará 144,5 m².
Esta actuación enmárcase nunha estratexia máis ampla do Concello para a mellora e ampliación das áreas infantís en toda a cidade, que inclúe investimentos significativos como o parque do Ventorrillo. Este último contará con cubertas para sombra e protección, sendo un equipamento pioneiro na cidade e parte do Plan de barrios 2025-2027, dotado con máis de 83 millóns de euros.
O proxecto do Ventorrillo ampliará a superficie do parque de 400 a 730 m², aumentando a capacidade de 76 a 135 usuarios. Incorporará novos equipamentos inclusivos e sensoriais, e dous grandes tobogáns aproveitando o noiro adxacente. Outras melloras recentes inclúen o parque do CEIP Concepción Arenal, que sumou unha torre multifuncional e bambáns, ampliando a súa superficie a 173 m².
