A competición terá lugar no pavillón de deportes do campus e contará con dúas modalidades: partidas rápidas e de lóstrego. O torneo, dirixido por Marcos Reza, conta co patrocinio da Universidade de Vigo, o Concello e a Deputación de Ourense. Agárdase superar a participación do ano pasado, que rexistrou máis de 70 inscritos por modalidade. Participarán mestres destacados como Xulio del Prado, Rubén Fernández e Samuel Villar.
O sábado disputarase o torneo de partidas rápidas, cun sistema suízo a nove rondas e un ritmo de xogo de dez minutos por xogador máis cinco segundos de incremento por xogada. Este torneo, válido para ELO de rápidas, comezará ás 10.30 h e rematará sobre as 20.00 h, repartindo 1775 euros en premios. Os galardóns inclúen un primeiro premio de 500 euros, un segundo de 350 e un terceiro de 200, ademais de premios para categorías específicas como sub 2000 ELO Fide, sub 1700 ELO Fide e para o mellor clasificado do club organizador.
O domingo, en horario de mañá, celebrarase o torneo blitz (lóstrego), cun sistema suízo a dez rondas e un ritmo de xogo de tres minutos por xogador máis dous segundos de incremento por xogada. Este torneo, válido para ELO de blitz, comezará ás 10.00 h e clausurarase ás 14.00 h. Repartiranse 725 euros en premios, cun primeiro premio de 200 euros, un segundo de 100 e un terceiro de 75, ademais de premios para as mesmas categorías específicas que no torneo de rápidas.
O prazo de inscrición remata o venres 18 de setembro ás 20.00 h. As cotas varían: 12 euros para xadrez rápido (15 euros se se paga o día do torneo en efectivo) e 8 euros para lóstrego (10 euros en efectivo). A inscrición en ambos os torneos custa 20 euros (25 en efectivo). Están exentos de pago os grandes mestres, mestres Fide ou internacional, e os socios do club Xadrez Ourensán Universitario.
