As obras, que xa foron adxudicadas, incluirán a creación dunha nova rampla co obxectivo de salvar o desnivel existente e facilitar o paso de persoas con mobilidade reducida, así como o tránsito de carriños de crianzas. Actualmente, o acceso está configurado por un tramo de escaleiras que obriga a efectuar rodeos para saír da praza.
Os servizos municipais estudaron as opcións viables, tendo en conta o desnivel e a existencia de portais de vivendas na contorna. A nova rampla construírase entre a Ronda de Outeiro e a praza, salvando o desnivel actual.
A intervención tamén prevé a instalación de varandas de aceiro inoxidable, pavimentos diferenciados como baldosas podotáctiles para persoas con visibilidade reducida e o axardinamento dun pequeno espazo lindeiro á futura rampla.
“"Adecuar o acceso á praza Alcaldesa Berta Tapia desde a rolda de Outeiro era unha actuación que tiñamos fixada e comprometida coa veciñanza, á que agradecemos a súa comprensión, paciencia e espírito de colaboración ao longo deste tempo de agarda."
A alcaldesa, Inés Rey, destacou a importancia desta medida para avanzar no plan de melloras de accesibilidade universal nos dez distritos da cidade. As obras, adxudicadas á empresa López Quinteiro, contan cun prazo de execución de tres meses a partir do inicio dos traballos.
