Un total de 19 candidaturas da Universidade da Coruña (UDC) obtiveron financiamento na convocatoria da Xunta de Galicia dirixida a unidades de investigación competitivas. A estas súmanse oito na modalidade de Persoal Investigador con Traxectoria Excelente. A cifra total de fondos acadados pola UDC ascende a máis de 4 millóns de euros, o que representa un aumento do 37% con respecto á edición anterior destas axudas.
Esta liña de subvencións céntrase na consolidación e estruturación de unidades de investigación nas universidades públicas galegas, a través de tres modalidades: Grupos de Referencia Competitiva (GRC), Grupos con Potencial de Crecemento (GPC) e Proxectos de persoal investigador con traxectoria excelente.
Na presente edición, foron financiados 10 Grupos de Referencia Competitiva cun apoio de 3,28 millóns de euros, e nove na modalidade de Grupos con Potencial de Crecemento, que recibirán 0,85 millóns de euros. Ademais, oito proxectos de persoal investigador con traxectoria excelente obtiveron financiamento por un total de 795.000 euros.
Os Grupos de Referencia Competitiva seleccionados inclúen o ESOMI (Equipo de Investigación Sociedades en Movemento), NEUROcom, QUIMOLMAT, NANOSEL4BIO, GEAMA, CTC, LIDIA, M2NICA, RNASA-IMEDIR e GRINCAR. Pola súa banda, os Grupos de Potencial Crecemento financiados son CADIE, FERROTRANS, ILLA, PROTERM, ACOM, GRIPA, DTSSECOMP, GEA e FCR.
No que respecta á modalidade de Proxectos de persoal investigador con traxectoria excelente, oito foron as candidaturas que obtiveron financiamento: Antonio Álvarez Naveira, Patricia Taladriz Blanco e Blanca Moncunill Solé; Natalia da Silva Lima, Jonathan Quison e Jessica Rodríguez Villar; Ana Ballesteros Pena; e Alva Martínez Teixeiro.
