A cadea española de mobiliario e deseño de interiores Kave Home volve estar operativa na Coruña dende este mércores, 27 de maio, despois de máis dun ano de obras de reforma na súa tenda da rúa San Andrés. A empresa Citanias foi a encargada de executar os traballos de renovación neste espazo situado no corazón da cidade.

O establecemento renovado conta cunha superficie de máis de 400 metros cadrados distribuídos en dúas plantas. Segundo informaron dende Citanias, o proxecto incluíu a demolición da distribución e acabados existentes, o ignifugado da estrutura metálica para cumprir coa normativa vixente e unha redistribución completa dos interiores, ademais da execución de todos os novos acabados.

Ademais das melloras estruturais, tamén se traballou no confort, a salubridade e a eficiencia enerxética do local. Kave Home busca con este novo espazo traer "novas coleccións, pezas personalizadas e servizos de deseño interior" ao centro da Coruña.

Kave Home, que xa tiña presenza en San Andrés dende decembro de 2021, é unha empresa española especializada en produtos para o fogar e mobiliario, con presenza internacional en máis de 80 países.