As instalacións do CIMA de Corón, en Vilanova de Arousa, acolleron a visita dunha delegación de vinte profesionais procedentes da República de Corea. A comitiva estaba integrada por pescadores, empresarios da acuicultura e persoal da administración pública do país asiático. Desprazáronse a Galicia co motivo da celebración da 27ª edición da Feira Internacional de Produtos do Mar Conxelados (Conxemar) en Vigo.
Durante o percorrido polas dependencias deste centro, adscrito á Consellería do Mar, os integrantes da comitiva mostraron interese polas liñas de traballo científico e innovación aplicada que se desenvolven nas instalacións. O obxectivo é favorecer a xestión sostible e a conservación dos recursos mariños das rías galegas.
A xuntanza permitiu un intercambio de experiencias sobre proxectos dirixidos á mellora dos cultivos mariños, o seguimento ambiental e a transferencia de coñecemento tecnolóxico ao sector produtivo. Os membros da delegación coreana afondaron nos modelos de mantemento dos hábitats costeiros e nos protocolos científicos aplicados ao ámbito marítimo-pesqueiro en Galicia.
Abordouse tamén o papel que desempeñan a investigación e a innovación aplicada na preservación dos ecosistemas e na viabilidade das actividades tradicionais do litoral.
