O sétimo número do boletín do proxecto DOWN TO EARTH recolle o evento de difusión celebrado a principios de xullo, onde se presentaron as principais leccións aprendidas durante os tres anos de implementación do proxecto en Galicia. Esta xornada tamén serviu para o lanzamento de EIRA (Espazo de Innovación Rural Aplicada), unha nova iniciativa colaborativa que se basea nos intercambios e nos resultados de investigación do proxecto.
Entre as boas prácticas destacadas das rexións socias atópanse dúas iniciativas galegas: a Plataforma Territorio Intelixente de Galicia e o proxecto Caprif-CC: Comunidades activas e paisaxes resilientes aos incendios forestais, liderado pola Fundación Juana de Vega.
No apartado de eventos, recóllese o encontro cos stakeholders galegos celebrado o 20 de maio. Estas reunións periódicas con persoas expertas locais, autoridades e profesionais do sector achegan perspectivas valiosas baseadas no coñecemento local sobre como cada rexión aborda a mitigación do cambio climático, os retos do despoboamento e a tradución das políticas públicas en accións concretas.
Ademais, o boletín ofrece acceso ao terceiro "Informe temático conxunto: Boas prácticas para fomentar o papel dos agricultores e xestores de terras na loita contra o cambio climático" e a informes anteriores. O documento analiza como os obxectivos climáticos europeos e nacionais se traducen en marcos operativos que inflúen na capacidade de acción dos agricultores. O informe presenta conclusións prácticas baseadas nas experiencias das rexións socias.
