O Centro de Investigación en Tecnologías de la Información y las Comunicaciones (CITIC) da Universidade da Coruña participou na XXVII edición de Ciencia en Acción, un certame internacional de divulgación científica celebrado en San Sebastián do 23 ao 25 de outubro. O obxectivo do encontro é achegar a ciencia e a tecnoloxía á sociedade mediante experimentos, demostracións e actividades participativas, fomentando o interese pola investigación e espertando vocacións científicas.
A investigadora do CITIC Adriana Dapena presentou a proposta divulgativa “CitasTIC: Investigar en IA”, que integrou tres proxectos de investigación sobre intelixencia artificial: Robótica Cognitiva, IA para o Recoñecemento de$_{Melodías}$ e IA contra o Odio. A través de xogos e actividades, a iniciativa permitiu mostrar de forma accesible como estas tecnoloxías se aplican a diferentes ámbitos e poden contribuír a abordar retos tecnolóxicos e sociais.
O proxecto Robótica Cognitiva mostrou como os sistemas robóticos poden aprender e adaptarse ao seu contorno, destacando aplicacións como o recoñecemento de obxectos para a clasificación de residuos. Pola súa banda, IA para o Recoñecemento de$_{Melodías}$ achegou as posibilidades da intelixencia artificial aplicada á análise musical, mostrando a súa aplicación ao recoñecemento de cancións tradicionais galegas. Finalmente, IA contra o Odio abordou o uso desta tecnoloxía para analizar contidos e identificar expresións de odio en internet.
Ciencia en Acción é un certame que promove a divulgación científica e tecnolóxica. A edición de San Sebastián reuniu máis de 300 participantes de diferentes comunidades autónomas, Portugal e Ecuador. A próxima edición celebrarase en Burgos en 2027.
