A iniciativa, aprobada en Consello de Goberno, articúlase a través dun regulamento de aplicación xeral e do Plan de Formación en Intelixencia Artificial Responsable (Plan FIAR). Esta combinación sitúa á USC entre as universidades españolas con propostas máis completas e sistemáticas neste ámbito.
O regulamento establece os principios, garantías, condicións de uso e responsabilidades para a utilización da IA na actividade universitaria, abordando aspectos como a transparencia, a responsabilidade humana, a integridade académica e científica, a protección de datos, a propiedade intelectual, a seguridade e a supervisión humana.
O Plan FIAR desenvolve as actuacións de formación, información e sensibilización, promovendo a alfabetización en IA e garantindo o coñecemento das súas posibilidades, limitacións e riscos. Estrutúrase en catro programas: IA na aprendizaxe, IA na docencia, IA na investigación e transferencia de coñecemento e IA na xestión universitaria.
A implantación será progresiva e incluirá a creación dunha rede de persoas referentes en IA e un sistema de seguimento e avaliación. Derivarán del guías, procedementos, modelos e cursos de formación.
A delegada da reitora para a Estratexia Dixital, María José Carreira, sinalou que "con esta iniciativa, a USC aposta por unha integración da intelixencia artificial que combine innovación, responsabilidade humana, protección dos dereitos e desenvolvemento de competencias, dentro dun marco institucional común e coherente".
Na mesma xuntanza, aprobáronse os estatutos da Fundación Outeiriño Seara, destinada ao impulso de proxectos no descubrimento e desenvolvemento de novos fármacos, cumprindo o mandato testamental de José Luís Outeiriño Seara.
A Fundación promoverá a investigación en diversas áreas farmacolóxicas, o asesoramento en proxectos, a creación de empresas baseadas no coñecemento universitario e a colaboración con outras entidades.
Outros temas tratados incluíron asuntos de persoal, a política de Calidade da USC, o regulamento do Centro de Linguas Modernas, a modificación da normativa de acreditación de idiomas estranxeiros, a incorporación á Asociación Plataforma Tecnológica Láctea Española Vía Láctea e a creación da Cátedra de Alfabetización Mediática.
