O Concello estivo representado por Emilio Álvarez-Miranda, director da Área de Medio Ambiente, Fondos Europeos e Dixitalización, quen presentou o proxecto Allocate e o seu modelo para desenvolver capacidades locais para unha intelixencia artificial verde e ética aplicada á cidade.
A xornada reúne en Roma representantes de institucións europeas, administracións públicas, do ámbito da investigación e académico. O encontro forma parte do programa Close to you da European Week of Regions and Cities, cita anual da Unión Europea dedicada á política de cohesión, ao desenvolvemento rexional e urbano e ao papel dos entes territoriais.
O Concello da Coruña concibe Allocate como unha iniciativa de cidade. O seu obxectivo é xerar capacidades locais para aplicar unha intelixencia artificial verde e ética e conectar o Concello, a universidade e as empresas para abordar retos urbanos concretos.
O proxecto incorpora tres principios: mellorar a eficiencia dos servizos urbanos, reducir o consumo enerxético das infraestruturas e modelos de IA, e incorporar a privacidade, seguridade e gobernanza desde o inicio.
Actualmente, o proxecto avanza cara á xeración de capacidades, co desenvolvemento de casos de uso, auditoría de infraestrutura e deseño de métricas enerxéticas. Tamén se está a despregar a Comunidade Local de Computación e a incorporar pemes.
O proxecto conta cun investimento de 5,5 millóns de euros, dos cales 4,4 millóns proceden do FEDER, no marco da European Urban Initiative, e 1,1 millóns correspóndenlle á achega municipal.
A participación do Concello da Coruña neste encontro permite incorporar a experiencia de Allocate ao intercambio entre administracións territoriais e institucións europeas sobre o uso da intelixencia artificial no sector público.
