O texto, pendente de trámite plenario, busca adaptar a regulación municipal á evolución dos servizos sociais, ao desenvolvemento da atención á dependencia e aos cambios na teleasistencia, que pasa de ser un dispositivo de alarma a un instrumento de prevención e acompañamento.
A nova ordenanza diferencia entre teleasistencia social no fogar e teleasistencia avanzada, incorporando dispositivos adicionais de monitorización e detección de riscos. O obxectivo é avanzar cara a unha atención máis preventiva e personalizada, incluíndo seguimento, prevención da soidade e illamento social, axendas, recordatorios e información sobre recursos sociais.
Inclúese tamén unha maior adaptación ás circunstancias de cada persoa, incluídas as de discapacidade visual ou auditiva, e a relación con outros servizos de asistencia doutras administracións para evitar duplicidades. O texto establece un catálogo de dereitos das persoas usuarias, regula o alta no servizo e as ausencias temporais, e mellora os mecanismos de control coa entidade prestadora.
A alcaldesa, Inés Rey, explicou que a ordenanza busca dotar o Concello dunha regulación máis actual, flexible e centrada na persoa. Precisamente, o pasado setembro aprobouse a licitación do servizo por 931.310 euros para os próximos tres anos, co obxectivo de alcanzar as 2.020 persoas usuarias no terceiro ano.
Ademais, a Xunta de Goberno Local tamén aprobou a adxudicación dun vehículo multiusos de emerxencias por 662.717 euros, que inclúe xornadas formativas para os bombeiros.
