A Axencia Tributaria de Galicia (Atriga) comunicará electronicamente á Xefatura Central de Tráfico a información necesaria para o cambio de titularidade nas transmisións de vehículos de segunda man. Este acordo, xa en vigor, elimina a obriga de que o contribuínte presente o Código Electrónico de Transmisións na Dirección Xeral de Tráfico tras a autoliquidación.
Ata agora, tras presentar a autoliquidación do Imposto sobre Transmisións Patrimoniais (modelo 620) ante a Atriga, esta xeraba un código que o cidadán debía achegar a Tráfico. Co novo convenio, a Atriga enviará directamente a información a Tráfico para que xestione o cambio de titularidade.
Ademais, o convenio amplía esta comunicación electrónica ás transmisións lucrativas, tanto por doazóns (modelo 651) como por sucesións mortis causa (modelo 650). Estímase que esta mellora beneficiará a preto dun 40% máis de cidadáns.
A única excepción será para as autoliquidacións de doazóns confeccionadas en papel, debido a limitacións tecnolóxicas. Nestes casos, o contribuínte deberá seguir comunicando o Código Electrónico de Transmisións á Tráfico. Este suposto representa un volume moi pequeno, cunha media do 0,20% anual sobre o total de autoliquidacións de transmisión de vehículos.
